De verbis vitae scholasticae propriis saec. XVI propositis

Hoc libro quem scripsit Simon Verrepaeus, vir quidam eruditus Studiorum Humanitatis praeceptor sive "humanista" -nisi omnia me fallunt!-, haec utilissima continentur:
1. rerum scholasticarum atque cottidianarum vocabula quorum haud pauca -quamquam id opus saeculo XVI elucubratum est- etiam nostris temporibus usui nobis esse possunt Latine scripturientibus seu dicturientibus;
2. formulae loquendi -quae, ex veterum auctorum locis, ni fallor, petitae sunt-;
3. lexicon quoddam antibarbarum -qualia solebant elucubrare studiorum humanitatis vindices seu humanistae qui 'modernum' sermonem Latinum ad exemplaria antiqua revocare sedulo diligenterque studebant -etiamsi novis vocabulis ditanda esset Latinitas ut novae res id postularent-.
Operis titulus est: "Latinae linguae progymnasmata sive primae studiorum exercitationes":
Primae parti hic est index: "rerum aliquot vulgarium vocabula et loquendi formulae in XII capita commodissime digesta"
Altera vero pars sic inscribitur: "Panoplia litteraria ad barbariem e scholis puerilibus profligandam".

http://books.google.com.au/books?id=Er4TAAAAQAAJ&printsec=frontcover&hl=es&source=gbs_ge_summary_r&cad=0#v=onepage&q&f=false 

 altera editio:

 http://books.google.es/books?id=Z749AAAAcAAJ&pg=PP5&dq=Latinae+lingvae+progymnasmata%2C+sive+Prim%C3%A6+studiorum+exercitationes

ecce index eorum quae eo in libro continentur:
"-Silvula quaedam Latinarum vocum ex solidae eruditionis viris litterarum ordine congesta ac disposita.
-Familiarium colloquiorum elegantiores formulae, verborum copia et varietate cum primis utiles.
-Selectiores aliquot quotidiani sermonis Phrases, ad profligandam e scholis barbariem comparatae.
-Vocabula et Latine aliquot loquendi formulae, quae a multis barbare vel parum usitate proferuntur, et c.
-Vocabulorum aliquot differentiae, ex La. Valla atque aliis quibusdam litterarum ordine congestae."

Legenti mihi Simonis Verepaei colloquiorum scholasticorum adumbrationem quam in libris supra laudatis scripserat, luce clarius patet Verepaeum ex illius Erasmi Roterodami -de quo tamen nullam iste facit mentionem suo in opusculo- Colloquiis Familiaribus, complures locutiones petivisse.

Sed haec raptim hactenus.  

Alias certe plura hac de re.